ნაფარეულის „ძველი მარანის ქვევრებში, ტრადიციულად დაყენებული ღვინოები იაპონიის ბაზარზე იყიდება.
 
როგორც რადიო „ჰერეთს“ ნაფარეული  – ძველი მარანის” დირექტორმა გელა გამტკიცულაშვილმა განუცხადა, ძველ მარანში ღვინო ძირითადად ტრადიციული წესით, ქვევრებში მზადდება და შემდეგ მინისა და პოლიეთილენის ბოთლებში ისხმება. სწორედ ქვევრში დაყენებული ღვინით 2009 წელს იაპონელი ბიზნესმენი დაინტერესდა, რომელმაც კახური ღვინო ,,ტევანი” იაპონიის ბაზარზე გაიტანა.
 
ამ ეტაპზე 500 ბოთლი ღვინოა გატანილი. იაპონიის მხარე ადგილობრივი ტელევიზიის და პრესის საშუალებით  ქართულ ღვინოს პოპულიზაციასაც უწევს. „ექსპერტებმა დაადგინეს, რომ ქვევრში დაყენებული ღვინო უნიკალურია. გაზაფხულიდან ჩვენი ღვინო ექსპორტზე ლატვიაში გავა, ასევე მიმდინარეობს მოლაპარაკებები იმ ბიზნესმენებთან, რომლებსა ჩვენი ღვინის გატანა ამერიკის ბაზარზე უნდათ“, – განუცხადა რადიო „ჰერეთს“ გელა გამტკიცულაშვილმა.
 
„ძველი მარანი“ წელიწადში 100 ტონამდე ღვინოს აწარმოებს. პროდუქციის ძირითადი ნაწილი სუპერმარკეტების ქსელში იყიდება.