რამდენად რევოლუციურია „რევოლუციურად“ წოდებული ახალი საგადასახადო კოდექსი და რეალურად, რა შედეგებს მოტანს ის ბიზნესისა და თითოეული მოქალაქისთვის? ამ საკითხებზე მსჯელობა ექსპერტთა და ბიზნეს წრეებში კვლავ აქტიურად მიმდინარეობს. ამ მსჯელობისა და შენიშვნების შედეგად, ხელისუფლება უკვე წავიდა დათმობებზე და მანამდე დაგეგმილ რამდენიმე ცვლილებაზე თქვა უარი: მაგალითად, პროექტის თავდაპირველი ვარიანტისგან განსხვავებით, კერძო უმაღლესი სასწავლებლები და სამედიცინო აპარატურის იმპორტი დღგ–თი აღარ დაიბეგრება.

თუმცა ექსპერტთა ნაწილი ახალი კოდექსისადმი უკმაყოფილებას მაინც გამოთქვამს. მაგალითად,  „ახალი ეკონომიკური სკოლის“ ვიცე–პრეზიდენტის გია ჯანდიერის განცხადებით, ახალი საგადასახადო კოდექსით საგადასახადო ადმინისტრირება კიდევ უფრო გაუარესდება და უხეში გახდება.

მისი თქმით, თუკი აქამდე საგადასახადო ინსპექცია მეწარმეებთან მეტ–ნაკლებად ფინანსური დოკუმენტაციის საფუძველზე მუშაობდა, ახლა იგი ხელების გადაგრეხვის მეთოდით დაიწყებს მეწარმეებთან ურთიერთობას, რათა გაიგოს ვინ არის მიკრო და ვინ მცირე მეწარმე.

გია ჯანდიერის განმარტებით, ახალი საგადასახადო კოდექსი მეწარმეებს უბიძგებს აირჩიონ არა განვითარების გზა, არამედ მიკრო მეწარმეებად დარჩნენ, რათა გადასახადების გადახდა არ დაეკისროთ.

სავაჭრო პალატის წარმომადგენლის განმარტებით კი, ახალ კოდექსში გაჩნდა მცირე მეწარმის ცნება, თუმცა საგადასახადო ტვირთი მასზე გაზრდილია. ასევე რამდენიმე მიმართულებით იზრდება ჯარიმებიც. მაგალითად, ზედნადების გარეშე ტვირთის გადაზიდვისთვის  კოდექსის პროექტის მიხედვით ჯარიმა ხუთმაგდება.

შეგახსენებთ, რომ ბიზნესის საგადასახადო კოდექსი თითქმის 100%–ით იცვლება. ჩნდება მიკრო და მცირე ბიზნესის ცნება. დღგ–ს გადამხდელთა ქვედა ზღვარი 100–დან 200 ათას ლარამდე იზრდება. 30 ათასამდე ბრუნვის მქონე მეწარმეები გადასახადებისგან თავისუფლდებიან. 30–დან 200 ათასამდე ბრუნვის მქონე მეწარმე ფიქსირებულ პროცენტს გადაიხდის, რაც 3-დან 5%–მდე იმერყევებს. ფინანსთა მინისტრის შეფასებით, მთავრობა შეგნებულად მიდის დამატებითი ღირებულების გადამხდელთა ქვედა ზღვარის გაორმაგებაზე და ამით დღგ–ს ათასობით გადამხდელს საგადასახადო ტვირთისაგან ათავისუფლებს.

კახა ბაინდურაშივილის განმარტებითვე, ამ შემოსავლების კომპენსაცია ძირითადად სპირტიან სასმელებზე აქციზის გაზრდით მოხდება. თუმცა, მისი განმარტებით, მოსახლეობა ამას ნაკლებად იგრძნობს.

რას ფიქრობთ ახალი კოდექსის შესახებ? რას შეცვლის ის თქვენი კომპანიის მუშაობაში და რამდენად რევოლუციურად მიიჩნევთ მას? აღნიშნულ თემებზე შეგიძლიათ საკუთარი აზრი ჩვენს ფორუმზე გამოთქვათ.