„ტურისტი, რომელიც სანადიროდ ჩამოდის, მარტო თოფს არ ისვრის“ - როგორც მონადირეთა და მეთევზეთა ფედერაციის პრეზიდენტმა თემურ ტყემალაძემ „ბინეზპრესნიუსთან“ საუბრისას განაცხადა, სამონადირეო ტურიზმი ერთ-ერთი ყველაზე მაღალბიუჯეტიანი დარგია.
„სამონადირეო ტურიზმი, როგორც წესი, მოიაზრება როგორც ერთ-ერთი ყველაზე მაღალბიუჯეტიანი დარგი. ტურისტი, რომელიც სანადიროდ ჩამოდის, მარტო თოფს არ ისვრის. ის სტუმრობს ქვეყნის სხვადასხვა რეგიონებსა და ქალაქებს, რესტორნებსა და მუზეუმებს, სასტუმროებს, ეზიარება ჩვენს კულტურასა და ისტორიას, რაც ერთის მხრივ ქვეყნის პოპულარიზაციას უწყობს ხელს, ხოლო მეორეს მხრივ, ქვეყნისთვის დამატებითი შემოსავლის წყაროს წარმოადგენს, - აღნიშნა მან.
როგორც თემურ ტყემალაძე აღნიშნავს, წელს საქართველოში ძალიან დიდი რაოდენობის ადგილობრივი მონადირე შეინიშნება.
„ნადირობის სეზონი გაიხსნა და ადგილობრივი არნახული რაოდენობის მონადირეა მთელი საქართველოს მასშტაბით. ეს არის შემოსავლის უდიდესი წყარო ქვეყნისთვის. რომ დავითვალოთ, დაახლოებით 100 000-მდე კაცმა 10-ლარიანი მოსაკრებელი გადაიხადა. ამის გარდა ტყვია, წამალი, იარაღი - არნახული რაოდენობით იყიდება. ერთი მხრივ ეს ძალიან კარგია. ჩანს, რომ დიდი მოთხოვნაა სანადირო ტურიზმზე, მეორე მხრივ, ამას სჭირდება რეგულირება, რომ ქაოსში არ გადავიდეს. არ შეიძლება, ვინც თოფი იყიდა, გამოვიდეს და ინადიროს“ - აღნიშნა თემურ ტყემალაძემ.
ფედერაციის პრეზიდენტი აღნიშნავს, რომ უცხოეთიდან მოთხოვნა დიდია, მაგრამ ჩვენ მათი დაკმაყოფილება არ შეგვიძლია.
„პერსპექტივა დიდია. უცხოეთიდან მოთხოვნა დიდია, მაგრამ ჩვენ მათი დაკმაყოფილება არ შეგვიძლია. უცხოელი აქედან კმაყოფილი ვერ წავა. იყო 35 სანადირო მეურნეობა, დარჩა 10-15, აქედან მხოლოდ 5 სულდგმულობს. ფაქტია, რომ ხარვეზებია და მეტი ყურადღება უნდა. კი არ უნდა მცირდებოდეს, უნდა იზრდებოდეს. ამდენი ტყვია-წამალი იყიდება და სად უნდა წავიდეს? ადამიანი იძულებული ხდება, იბრაკონიეროს, მითუმეტეს ახალგაზრდობა, არადა, თავისუფლად შეიძლება, სახელმწიფოც და ხალხიც თანაბრად იყოს კმაყოფილი“ - აცხადებს ტყემალაძე.
შეგახსენებთ, რომ საქართველოში 2025 წლის 23 აგვისტოს გადამფრენ ფრინველებზე ნადირობის სეზონი გაიხსნა.
