სასტუმროს 99% დატვირთულია - დამსვენებელთა 80% არაბული ქვეყნებიდან არიან, - ამის შესახებ ბაკურიანში მდებარე სასტუმრო Crystal Hotel & SPA-ს გაყიდვების მენეჯერმა გიორგი მაისურაძემ "ბიზნესპარტნიორთან" განაცხადა.
მისივე ინფორმაციით, აღნიშნულის გარდა, სასტუმროში ებრაელების აქტივობაც შეინიშნება.
"შარშან 108 ნომერი გვქონდა, წელს 172 ნომერი გვაქვს და 99%-იანი დატვირთვა გვაქვს. მოთხოვნის კლება ნამდვილად არ შეინიშნება წინა წელსაც დატვირთულობა 90-95% იყო.ევროპელი ტურისტების აქტივობა, დაახლოებით, 6 წელია რაც აღარ შეინიშნება. რაც შეეხება აზიურ ბაზარს - კორონა ვირუსამდე გვყავდა ჯგუფები სამხრეთ კორეიდან, თუმცა ამჟამად აღარ არიან", - აცხადებს გიორგი მაისურაძე.
როგორც სასტუმროს გაყიდვების მენეჯერი აღნიშნავს, წინასწარი ჯავშნები შემოდგომის პერიოდზე უკვე აქტიურად შემოდის და ძირითადი ბაზარი ისევ არაბული ქვეყნებია.
