„უსამართლობა. უსამართლობის განცდა და იმის შეგრძნება, რომ რაც დღეს ქვეყანაში ხდება, აბსოლუტური სურეალიზმია“ - ასე პასუხობს ბიზნესმენი ლევან ყარალაშვილი კითხვას, რა აწურებს დღეს ბინზესს ყველაზე მეტად.
მისი შეფასებით, ქვეყანაში შექმნილი ზოგადი განწყობა დამთრგუნველად მოქმედებს როგორც მომხმარებელზე, ასევე მეწარმეებზე. ყარალაშვილი ამბობს, რომ თავად ბიზნესი, რომელიც თავისი ბუნებით ოპტიმისტური ერთეულია, დღეს მოტივაციის გარეშეა და სიახლის დაწყების სურვილიც კი აღარ აქვს.
" უსამართლობა. უსამართლობის განცდა და იმის შეგრძნება, რომ რაც დღეს ქვეყანაში ხდება აბსოლუტური სურეალიზმია. იმის შეგრძნება, რომ ბიზნესი, რომელიც თავისი ბუნებით საკმაოდ ოპტიმისტური ერთეულია, ეს არის ხალხის ერთობა, რომელიც რაღაცას ქმნის. ახლა, ამის სურვილიც კი არ აქვს ბიზნესს, რომ რაღაც ახალი თემა დაიწყოს, ახალი დაძრას. განწყობა რომელიც ზოგადად არის შექმნილი, ზემოდან წნეხივით აწვება და ყველაზე მოქმედებს ჯაჭვურად. დაწყებული მომხმარებლიდან ბიზნესმენით დამთავრებული აქვთ უსამართლობის განცდა, განცდა იმის, რომ დღეს რაც ქვეყანაში ხდება არასწორია და ამის შედეგია ის, რომ ბევრი ბიზნესი დღეს ჩუმადაცაა და არის გაურკვევლობაში.
მე, ხშირად მიხსენებია ასეთი ტერმინი ფრთხილი ოპტიმიზმი. სამწუხაროდ, დღეს ამისთვისაც აღარ დარჩა ადგილი. ბიზნესმა ისწავლა ბოლო პერიოდში, რომ თვითგადარჩენისთვის გვიწევს ბრძოლა და ხდება რესურსების დაზოგვა და ოპტიმიზაცია. ვართ ფრთხილად და ველოდებით უკეთეს დროს, რომელიც როდის მოვა, იმდენად ბურუსითაა მოცული, ყოველგვარი სიახლის და ინოვაციის სურვილს აქრობს", - განაცხადა ლევან ყარალაშვილმა bm.ge-სთან.
