ოლდოველი ექიმი, ფილიპინელი ექთანი, ეგვიპტელი ქირურგი - ისინი სულ უფრო ხშირად ხდებიან ევროპული მედიცინის სახე. ამის შესახებ საუბარია სტატიაში, რომელსაც ჯანმრთელობის მსოფლიო ორგანიზაცია აქვეყნებს. ჯანმო-ევროპის ახალი ანგარიშის თანახმად, რეგიონის ჯანდაცვაში უცხოელი სპეციალისტების რაოდენობა ბოლო ათი წლის განმავლობაში მკვეთრად გაიზარდა: ექიმებს შორის 58 პროცენტით და ექთნებს შორის 67 პროცენტით. მეტიც: მათი უმრავლესობა - ექიმების 60 პროცენტზე მეტი და ექთნების 72 პროცენტი - ევროპის ფარგლებს გარეთ იყო მომზადებული.
„ყველა მიგრაციის უკან დგას ისტორია - უკეთესი მომავლის სურვილი, ასევე ოჯახთან განშორება და იმ ქვეყნების ჯანდაცვის სისტემების შესუსტება, საიდანაც ეს სპეციალისტები წავიდნენ“, - აღნიშნავს ნატაშა აზოპარდი-მუსკატი, ჯანმო-ევროპის ჯანდაცვის პოლიტიკის დეპარტამენტის დირექტორი.
ანგარიში მოიცავს ცხრა ქვეყანას - ირლანდიიდან ტაჯიკეთამდე - და აჩვენებს, თუ რამდენად არათანაბრად ნაწილდება მიგრაციის შედეგები. აღმოსავლეთ და სამხრეთ ევროპა ათასობით პროფესიონალს კარგავს, რაც არსებულ სამუშაო ძალის დეფიციტს ამწვავებს. ამასობაში, დასავლეთის და ჩრდილოეთის ქვეყნები სულ უფრო მეტად არიან დამოკიდებულნი უცხოელ მუშაკებზე. მაგალითად, ირლანდიაში ექთნების ნახევარზე მეტი და ექიმების 43 პროცენტი საზღვარგარეთ კურსდამთავრებულები არიან.
ჯანმოს პროგნოზით, 2030 წლისთვის ევროპა ჯანდაცვის 950 000 მუშაკის დეფიციტის წინაშე აღმოჩნდება. ორგანიზაციის აზრით, ჯანდაცვის სისტემების კოლაფსის თავიდან ასაცილებლად, ქვეყნებმა სასწრაფოდ უნდა განახორციელონ კადრების შენარჩუნების სტრატეგიები და ინვესტიციები ჩადონ ტრენინგებში.
მიუხედავად იმისა, რომ ადრე მიგრაცია სამხრეთიდან ჩრდილოეთისკენ უწყვეტ ნაკადად აღიქმებოდა, დღეს სურათი გაცილებით რთულია. მაგალითად, გერმანია ავსტრიის, შვეიცარიისა და ბულგარეთის ექიმების მთავარი მიმწოდებელი გახდა. რუმინეთში უცხოელი სამედიცინო პროფესიონალების ყველაზე დიდი ჯგუფი მოლდოვიდან ჩამოსული სპეციალისტები არიან.
