საქართველოს ნაკრები ევროპის ჩემპიონატზე საბერძნეთს დაუპირისპირდება. მატჩი თბილისის დროით 16 საათზე დაიწყება, ხოლო მის რეპორტაჟს საქართველოს პირველი არხი და პირველი არხი სპორტი შემოგთავაზებთ.
იტალიასთან თორნიკე შენგელია ორი არასპორტული შენიშვნის გამო მოედნიდან გააძევეს, თუმცა ეს მომდევნო მატჩის გამოტოვების საფუძველი არ არის. როგორც მთავარმა მწვრთნელმა, ალექსანდრ ჯიკიჩმა აღნიშნა, საქართველოს ნაკრებმა იცის, რა მიზანი აქვს და რომელ მატჩზე გაამახვილოს ყურადღება. ეს კი იმას ნიშნავს, რომ ენერგია იმ მატჩებისთვის უნდა გამოიზოგოს, რომლებშიც უშუალო კონკურენტთან გამარჯვება სჭირდება. ასეთად ბოსნია-ჰერცეგოვინა გვესახებოდა, თუმცა საწყის ტურში ესპანეთის დამარცხების შემდეგ საკითხავია, მესამე-მეოთხე ადგილისთვის მებრძოლი გუნდია ჩვენი ნაკრების უშუალო კონკურენტი თუ პირველი ადგილისთვის.
საბერძნეთის მწვრთნელმა მეორე ტურში გუნდის ლიდერი იანის ანტეტოკუნმპო დაასვენა, თუმცა მის გარეშეც იოლად სძლია კვიპროსს.
ევროპის ჩემპიონატზე 24 ნაკრები ოთხ ჯგუფშია გადანაწილებული. პლეი ოფის საგზურს ყოველი ჯგუფის ექვსიდან ოთხი გუნდი მიიღებს.
