Politico წერს, რომ NATO-ს აღმოსავლეთ ფლანგის ყველა სახელმწიფო ჯანდაცვის კრიზისებზე რეაგირების პროტოკოლებს გადახედავს. მაგალითად, გამოცემის ცნობით, ლიეტუვაში საავადმყოფოები ელექტროენერგიის გენერატორებს ამონტაჟებენ და ელექტროენერგიისა და წყლის გათიშვის შემთხვევაში მედიკამენტებსა და წყალს აგროვებენ.
Politico-ს პუბლიკაციაში ნათქვამია, რომ ესტონეთში ჯანდაცვის მუშაკებს მობილური ქსელების გათიშვის შემთხვევაში სატელიტური ტელეფონები ეძლევათ, ხოლო სასწრაფო დახმარების მუშაკებს - ტყვიაგაუმტარი ჟილეტები. ქვეყანა ასევე მობილურ სამედიცინო დანაყოფებს ყიდულობს.
სტატიაში მოყვანილია ესტონეთის ჯანდაცვის დეპარტამენტის უფროსის მოადგილის, რაგნარ ვაიკნემეცის განცხადებაც, რომელმაც თქვა, რომ „რუსეთის თავდასხმა დროის საკითხია“. მან ასევე გამოთქვა მოსაზრება, რომ აღმოსავლეთ ევროპაში საბჭოთა პერიოდიდან შემორჩენილი მრავალი საავადმყოფო დაუცველია მათი არქიტექტურის თავისებურებების გამო. მისი თქმით, სამედიცინო დაწესებულებები ახლა იმაზე ფიქრობენ, თუ როგორ გადაიტანონ ოპერაციული ოთახები სარდაფებში საჭიროების შემთხვევაში.
Politico აღნიშნავს, რომ ევროკავშირის საბჭოს თავმჯდომარეობის დროს პოლონეთმა ყურადღება გაამახვილა ევროკავშირის ჯანდაცვის სისტემის სამხედრო კონფლიქტისთვის მომზადებაზე.
