საქართველოში კალათბურთის განვითარების ისტორიაში ახალი ფურცელი იშლება – NBA, მსოფლიოს წამყვანი საკალათბურთო ლიგა, ოფიციალურად შემოდის ჩვენს ქვეყანაში. ჯანო ბაგრატიონის სახელობის სპორტული სკოლისა და ჯეიბიეს აკადემიის შვილობილმა კომპანიამ „ჯეიბიეს კალათბურთმა“ NBA-სთან ფრანჩაიზის ხელშეკრულება გააფორმა და საქართველოში პირველი ოფიციალური NBA Basketball School-ის გახსნაზე მოიპოვა ლიცენზია. ქართველი ახალგაზრდებისთვის ეს ნიშნავს, რომ მათ ეძლევათ შესაძლებლობა ივარჯიშონ იმავე პროგრამით, რომელიც შემუშავებულია NBA-ის საერთაშორისო კალათბურთის ოპერაციების დეპარტამენტის მიერ, მოქმედ და ყოფილ NBA-ის მწვრთნელებთან, მოთამაშეებთან და სპეციალისტებთან კონსულტაციით.
პროექტი სტარტს აიღებს 10-14 სექტემბერს 5-დღიანი ინტენსიური საშემოდგომო ბანაკით, სადაც 9-17 წლის ბავშვებს მიეცემათ შანსი, გამოიმუშაონ ტექნიკური უნარები, შეისწავლონ გუნდური მუშაობის პრინციპები და განივითარონ საკალათბურთო აზროვნება, NBA-ის მეთოდოლოგიით. ბანაკში მონაწილეებს მენტორობას გაუწევენ NBA-ს მიერ სერტიფიცირებული საერთაშორისო მწვრთნელები, ხოლო ინდივიდუალური მიდგომა ყველა მონაწილის მაქსიმალურ ჩართულობას უზრუნველყოფს.
29 სექტემბრიდან კი იწყება სრულფასოვანი პროგრამა, სადაც გუნდები ივარჯიშებენ კვირაში სამჯერ NBA-სა და USA Basketball-ის რეკომენდაციების შესაბამისად. გუნდები მიიღებენ მონაწილეობას არა მხოლოდ ადგილობრივ ტურნირებში, არამედ ამხანაგურ მატჩებსა და საერთაშორისო შეჯიბრებებშიც, რაც ახალგაზრდა სპორტსმენებს მისცემს გლობალურ საკალათბურთო სივრცეში ინტეგრაციის შესაძლებლობას.
„ქართველ ახალგაზრდებს ეძლევათ იშვიათი შანსი – ივარჯიშონ და განვითარდნენ იმავე სტანდარტებითა და მეთოდოლოგიით, რასაც იყენებენ მსოფლიოს საუკეთესო ლიგაში,“ – გვიამბობს ირაკლი შენგელია, NBA Basketball School Georgia-ს გენერალური მენეჯერი.
M: რა გზა გაიარეთ NBA-სთან თანამშრომლობის დასაწყებად და რა უნიკალურ შესაძლებლობებს სთავაზობს NBA Basketball School Georgia ქართველ ახალგაზრდებს?
NBA-თან მოლაპარაკება წელიწადზე მეტხანს გრძელდებოდა და საკმაოდ რთული პროცესი იყო. მოხარულნი ვართ, რომ შევძელით მათი დარწმუნება და საქართველოში შემოყვანა. გვჯერა, რომ NBA-ს საკალათბურთო სკოლის გახსნა მნიშვნელოვან წვლილს შეიტანს ქართული კალათბურთის განვითარებაში და ქართველ ახალგაზრდებს საშუალებას მისცემს, NBA-ს დიდი ოჯახის ნაწილი გახდნენ.
სკოლის მთავარი უპირატესობაა NBA-ს მიერ შემუშავებული უნიკალური სასწავლო პროგრამა – The NBA Way. ეს გახლავთ 1,200-გვერდიანი დეტალური სახელმძღვანელო, რომელიც NBA-ს მოქმედი და ყოფილი მწვრთნელების, მოთამაშეებისა და საუკეთესო სპეციალისტების მონაწილეობით შეიქმნა. პროგრამა მოიცავს არა მხოლოდ ტექნიკურ და ტაქტიკურ ასპექტებს, არამედ ფიზიკურ მომზადებასა და სპორტსმენის მთლიან განვითარებას.
