ფუტსალში საქართველოს ჩემპიონმა „კავკასიის საერთაშორისო უნივერსიტეტმა“ (კსუ) ჩემპიონთა ლიგის წინასწარი G ჯგუფის მესამე ტურში უელსის ჩემპიონი „კარდიფი“ 7:0 დაამარცხა და ტურნირი მეორე ადგილზე დაასრულა.
მასპინძელ (ბოსნიის) „ბუბა მარასთან“ წაგებისა (1:4) და ირლანდიის ჩემპიონთან, „ბლუ მეჯიქ დუბლინთან“ მოგების (4:1) შემდეგ საქართველოს ჩემპიონი ჯგუფიდან გასვლის შანსს ინარჩუნებდა.
კსუ-მ შეხვედრა მაღალ დონეზე ჩაატარა და პირველი ტაიმი ტყეშელაშვილის დუბლით (14, 19) 2:0 მოიგო. მეორე ტაიმში კი თითო ბურთი წერეთელმა (21), ბექაურმა (23), მანგოშვილმა (28), მაჩიტიძემ (30) და გიორგაიამ (32) გაიტანეს.
საქართველოს ჩემპიონმა სამი ტურის შემდეგ ექვსი ქულა დააგროვა და ჯგუფში მეორე ადგილი დაიკავა. „ბუბა მარამ“ „ბლუ მეჯიქ დუბლინს“ სძლია, 9 ქულა დააგროვა და ჩემპიონთა ლიგის შემდეგ ეტაპზე ჯგუფის გამარჯვებულის სტატუსით გავიდა.
