ტრამპი უკრაინის საკითხზე მოლაპარაკებებიდან გასვლას ფიქრობს, – ამის შესახებ ამერიკული გამოცემა „აქსიოსი“ წერს.
როგორც გამოცემა თეთრ სახლში არსებულ ანონიმურ წყაროებზე დაყრდნობით იუწყება, აშშ-ის პრეზიდენტი რუსეთისგან და უკრაინისგან მოითხოვს „დიდ მოქნილობას“, წინააღმდეგ შემთხვევაში ის დიპლომატიურ ძალისხმევას შეწყვეტს.
წყაროს განცხადებით, დონალდ ტრამპი სერიოზულად განიხილავს დიპლომატიურ ძალისხმევაზე უარის თქმას, ვიდრე „ერთი ან ორივე მხარე არ დაიწყებს მეტი მოქნილობის გამოვლენას“.
„ჩვენ დავსხდებით და დავაკვირდებით. დაე, ცოტა კიდევ იომონ, ვნახოთ, რა იქნება“, – ციტირებს წყაროს „აქსიოსი“. ამასთან, სტატიაში აღნიშნულია, რომ ზოგიერთი ამერიკელი მაღალჩინოსანი ევროპელ ლიდერებს „მთავარ დაბრკოლებად“ განიხილავს კონფლიქტის დარეგულირების გზაზე, რომლებიც, მათი თქმით, საჯაროდ მხარს უჭერენ ტრამპის სამშვიდობო ძალისხმევას, თუმცა ფარულად ცდილობენ „პროგრესის გაუქმებას“, რომელიც ალასკის სამიტზე იქნა მიღწეული. მათივე თქმით, ევროპელი ლიდერები ზეწოლას ახორციელებენ ვოლოდიმირ ზელენსკიზე, რომ მან „საუკეთესო შეთანხმებას“ მიაღწიოს. „ევროპელებს არ შეუძლიათ, გააჭიანურონ ომი და კულისებში მხარს უჭერდნენ დაუსაბუთებელ მოლოდინებს, ამავდროულად, იმედი ჰქონდეთ, რომ ამერიკა დაფარავს ხარჯებს. ევროპას თუ სურს ამ ომის ესკალაცია, ეს მისი საქმეა, თუმცა ის უიმედოდ განიცდის მარცხს, გამარჯვების ნაცვლად“, – ამბობს წყარო.
