2026 წლის 1 იანვრამდე, ელექტროენერგიის ბირჟაზე ვაჭრობასთან დაკავშირებული ყველა ტარიფი ნულოვან დონეზე შენარჩუნდა. საქართველოს ენერგეტიკული ბირჟის ინფორმაციით, საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ 2025 წლის 27 აგვისტოს #28 დადგენილებით დაამტკიცა ბირჟის ოპერატორის მომსახურების საფასურები. დადგენილების მიხედვით, 2025 წლის 1 სექტემბრიდან 2026 წლის 1 იანვრამდე, ელექტროენერგიის ბირჟაზე ვაჭრობასთან დაკავშირებული ყველა ტარიფი შენარჩუნდა ნულოვან დონეზე.
კერძოდ, როგორც აქამდე, 2025 წლის 1 სექტემბრიდან 2026 წლის 1 იანვრამდე ბაზრის მონაწილეები არ გადაიხდიან დღით ადრე და დღიურ ბაზრებზე დაშვების საფასურს. ასევე ნავაჭრი ელექტროენერგიისთვის საფასურს. ისინი წლის ბოლომდე გათავისუფლებული არიან ასევე დღით ადრე და დღიურ ბაზრებზე დამატებითი პორტფელის მომსახურების საფასურისგან.
ენერგეტიკული ბირჟის მონაცემებით, 2025 წლის მეორე კვარტალში ბირჟაზე 30 ივნისის მდგომარეობით, დღით ადრე აუქციონში მონაწილეობისათვის ბირჟაზე რეგისტრირებული იყო 24, ხოლო დღიურ ბაზარზე მონაწილეობისთვის - 17 მონაწილე.
2025 წლის მეორე კვარტალში დღით ადრე ბაზარზე მონაწილეებმა ივაჭრეს 93 115 მგვტ.სთ ელექტროენერგია, რაც 2025 წლის პირველი კვარტალის ნავაჭრ რაოდენობას (1 789 მგვტ.სთ) თითქმის 52-ჯერ, ხოლო 2024 წლის მეორე ნახევარში ნავაჭრ რაოდენობას (17 494 მგვტ.სთ) - 5-ჯერ აღემატება.
ამასთან, დღიურ ბაზარზე პირველი ტრანზაქცია 2025 წლის 6 მაისს შედგა. ნავაჭრმა რაოდენობამ შეადგინა 381.6 მგვტ.სთ, ხოლო ფასი ჩამოყალიბდა 125 ლარი/მგვტ.სთ.
"მიუხედავად იმისა, რომ დღიური ბაზარი წარმოადგენს მნიშვნელოვან ინსტრუმენტს, მასზე აქტიურობა დაბალია. დღიური ბაზარი მონაწილეებს აძლევს შესაძლებლობას, მოკლევადიან სიგნალებზე რეაგირებით მიიღონ სარგებელი. რადგან არსებულ მოდელში არ არსებობს საათობრივი დაბალანსების ვალდებულება და ფასები ძირითადად უცვლელია დღის განმავლობაში, მონაწილეებს აქვთ მცირე მოტივაცია აქტიურად ივაჭრონ დღიურ ბაზარზე", - განმარტებულია ელექტროენერგიის ბირჟაზე ვაჭრობის მეორე კვარტალის ანგარიშში.
