უპილოტო საფრენი აპარატების (UAV) გლობალური ბაზარი 2030 წლისთვის თითქმის სამჯერ გაიზრდება - 2024 წლის 32.2 მილიარდი დოლარიდან თითქმის 90 მილიარდ დოლარამდე, – წერს ინდუსტრიული გამოცემა Offshore Technology, Global Data-ს კვლევაზე დაყრდნობით.
უკვე 2025 წლისთვის კომერციული დრონები სამხედრო დრონებს გადაასწრებენ და ბაზრის უდიდეს სეგმენტად იქცევიან. „ნავთობისა და გაზის ინდუსტრია ამ ზრდის ერთ-ერთი მთავარი მამოძრავებელი სექტორია, რადგან ოპერატორები სულ უფრო ხშირად იყენებენ უპილოტო საფრენ აპარატებს ინსპექტირების, ემისიების მონიტორინგისა და საზღვაო ლოჯისტიკისთვის. ბაზრის ეს სწრაფი ზრდა ხაზს უსვამს იმას, რომ დრონები აღარ არის ნიშური ინსტრუმენტები, არამედ ენერგეტიკის სექტორში ოპერაციული მდგრადობისა და სტაბილურობის მთავარი ხელშემწყობი ფაქტორია“, - განმარტავენ ანალიტიკოსები. მათი თქმით, სახიფათო გარემოში ადამიანის პირდაპირი ჩარევის საჭიროების შემცირებით, დრონები აწესებენ ახალ უსაფრთხოების სტანდარტებს და ამავდროულად აუმჯობესებენ ნავთობისა და გაზის წარმოების, ტრანსპორტირებისა და გადამუშავების ოპერაციების ეფექტურობასა და ეკონომიურობას.
