„საქმე განათლებისა და ცნობიერების პრობლემასთან გვაქვს. ნადირობის საბაზისო წესები არ იციან, ფრინველებს ერთმანეთისგან ვერ არჩევენ, ელემენტარულში ვერ ერკვევიან და მაინც პრეტენზია აქვთ, მონადირეები ერქვათ“, - ამის შესახებ „ბიზნესპრესნიუსთან“ „მოძრაობა ბრაკონიერობის წინააღმდეგ“ დამფუძნებელმა, კობა მათითაიშვილმა, განაცხადა.
ცნობისთვის, 2025 წლის 23 აგვისტოს გადამფრენ ფრინველებზე ნადირობის სეზონი გაიხსნა. გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტი უკანონო ნადირობის ფაქტების პრევენციის, აღკვეთისა და გამოვლენის მიზნით, სეზონის განმავლობაში, ქვეყნის მასშტაბით, 24-საათიან მკაცრ კონტროლს ახორციელებს.
„ნადირობა მხოლოდ თოფის სროლა ხომ არაა?! წითელი წიგნის ფრინველებსა და ცხოველებს ესვრიან. აღარაფერს ვამბობ იმაზე, რომ თანამედროვე ტენდენციებში გარკვევას საერთოდ არ ცდილობენ. კიდევ ერთი სერიოზული პრობლემა მანოკების გამოყენებაა, რაც წელს იმდენად არ შეინიშნება, მაგრამ მაინც არიან უვიცი მონადირეები, რომლებიც დადიან და ნადირობენ.
ნადირობის საბაზისო წესები არ იციან, ფრინველებს ერთმანეთისგან ვერ არჩევენ, ელემენტარულში ვერ ერკვევიან და მაინც პრეტენზია აქვთ, მონადირეები ერქვათ!
ასევე, მათი საკმაოდ დიდი ნაწილი ნადირობას სეზონის გახსნამდე კვირებით და ხან თვით ადრე იწყებს. დაინახავენ მწყერს და ეგრევე თოფით გამორბიან. ასეთი მონადირეების სიმართლის არ მჯერა, ისინი სულწასულობის, სულმოკლეობისა და არაკეთილსინდისიერების მაგალითები არიან.
ასეთი ადამიანების წინააღმდეგ ყოველწამიერი ბრძოლაა საჭირო, ისინი ბუნებას არ უნდა ეკარებოდნენ, რისთვისაც ჩვენი ორგანიზაცია და გარემოს ზედამხედველობის სამსახური ბევრს ვაკეთებთ, მაგრამ ეს ზღვაში წვეთია და გაცილებით მეტია საჭირო. ზედამხედველობის სამსახურს რესურსში ძალიან უჭირს, არც კადრები ჰყავთ.
რაც შეგვეხება ჩვენ, სრულად ენთუზიაზმზე ვმუშაობთ, ნული ფინანსური ინტერესით და, პირიქით, თუკი რამეს ვაკეთებთ, ამისთვისაც საკუთარი ჯიბიდან ვიხდით თანხებს. დრონებით მდინარეებს ვაკონტროლებთ, სხვადასხვა წერტილებს ცოცხალი ძალით ვაკვირდებით, ფოტო ხაფანგებს ვაგებთ - ჩვენი ძალებითა და რესურსით მეტი ფიზიკურად არ შეგვიძლია“, - განაცხადა მათითაიშვილმა „ბიზნესპრესნიუსთან“.
