წელს ევროკავშირში 1 მლნ ჰექტარი ტყე დაიწვა. 2006 წლის შემდეგ, რაც ევროპის ტყის ხანძრების სტატისტიკის აღრიცხვა ხდება, მიმდინარე ზაფხული ყველაზე ცუდ სეზონად დასახელდა.
ყველაზე მეტად ესპანეთი და პორტუგალია დაზარალდნენ, სადაც პირენეის ნახევარკუნძულის 1% დაიწვა. ამის შესახებ ევროკავშირის მეცნიერები აცხადებენ.
ლონდონის World Weather Attribution ჯგუფის მიერ ჩატარებულმა ცალკეულმა კვლევამ აჩვენა, რომ ხანძრების გაუარესების მდგომარეობა პირდაპირ კავშირშია კლიმატის ცვლილებასთან და ექსპერტები აფრთხილებენ, რომ ევროპა მომავალში უფრო ხშირი და ინტენსიური ხანძრების წინაშე აღმოჩნდება.
ევროპის ტყის ხანძრების საინფორმაციო სისტემის მონაცემებით, ესპანეთში წლის დასაწყისიდან 26 აგვისტომდე მონაცემებით, 400 000 ჰექტარზე მეტი დაიწვა. ეს მაჩვენებელი ექვსჯერ აღემატება 2006 წლიდან 2024 წლამდე ანალოგიური პერიოდის საშუალო მაჩვენებელს.
ძლიერ დაზარალდა მეზობელი პორტუგალიაც, სადაც 270 000 ჰექტარი დაიწვა - თითქმის ხუთჯერ მეტი, ვიდრე იმავე პერიოდის საშუალო მაჩვენებელია. წელს პირენეის ნახევარკუნძულზე დამწვარი ფართობის საერთო მაჩვენებელი 684 000 ჰექტარია და ამ ტერიტორიის დიდი ნაწილი სულ რაღაც ორ კვირაში განადგურდა.
ხანძრის შედეგად გამოწვეულმა კვამლმა მკვეთრად გააუარესა ჰაერის ხარისხი, სამხრეთის ქარებმა კი კვამლი საფრანგეთსა და დიდ ბრიტანეთში მიიტანა. კლიმატის ცვლილება ზრდის ტყის ხანძრების რისკს. ხანძრები ასევე ატმოსფეროში მეტ ნახშირორჟანგს გამოყოფს, რაც პლანეტის დათბობას იწვევს.
ევროკავშირის მონაცემებით, ესპანეთში ხანძრების შედეგად გამოყოფილი CO2-ის რაოდენობამ წელს რეკორდულ 17.68 მლნ ტონას მიაღწია. ეს მეტია ქვეყანაში ხანძრების შედეგად გამოყოფილი CO2-ის წლიურ მაჩვენებელზე 2003 წლიდან, როდესაც მონაცემები პირველად დაფიქსირდა თანამგზავრის საშუალებით.
World Weather Attribution-ის გუნდის დასკვნით, ადამიანის მიერ გამოწვეულმა კლიმატის ცვლილებამ თურქეთში, საბერძნეთსა და კვიპროსში ხანძრების ალბათობა დაახლოებით, 10-ჯერ გაზარდა.
თუმცა, დროთა განმავლობაში ველური ბუნების დიდი ნაწილი ხანძართან გარკვეულწილად ადაპტირდა. ზოგიერთი სახეობა, მაგალითად, იბერიული ფოცხვერი შედარებით მარტივად უძლებს მსგავს გარემოებებს, ხოლო ადგილობრივი კორპის მუხა სწრაფად ახერხებს დამწვარი მიწების აღდგენას.
ლონდონის ეკონომიკის სკოლის გარემოსდაცვითი გეოგრაფიის ასოცირებული პროფესორის, თომას სმიტის თქმით, თანამედროვე ხანძრები უფრო მასშტაბური, ხშირი და დამანგრეველი გახდა. „ტყიანი ტერიტორიები, რომლებიც შემდეგი ხანძრის დაწყებამდე აღდგენას ცდილობენ, შეიძლება კლიმატზე დამოკიდებული ციკლის ნაწილი გახდეს“ - ამბობს ის.
მისი თქმით, ხანძრისადმი მიდრეკილ ადგილებში ზედმეტი მცენარეების მოცილება, ასევე მომავალი ხანძრების პრევენციის, გამოვლენისა და ჩაქრობის ახალი მეთოდები, ხელს შეუწყობს ხანძრების რაოდენობისა და მათ მიერ გამოწვეული ზიანის შემცირებას.
