ეკონომისტი სოსო არჩვაძე, 2025 წლის ივლისის ეკონომიკურ მაჩვენებლებს აფასებს და აღნიშნავს, რომ ქვეყანამ კვლავ შეინარჩუნა მდგრადი და სტაბილური განვითარების ვექტორი, რაც 6.5%-იან ეკონომიკურ ზრდაში აისახა. იანვარ-ივლისის მონაცემებით, ზრდა 8%-ს მიაღწია, რაც რეგიონისა და გლობალურ ტენდენციებს მნიშვნელოვნად – დაახლოებით 1.7-ჯერ აღემატება.
მისივე თქმით, აღნიშნული პოზიტიური ფაქტორების რიგშია აგრეთვე ისიც, რომ კარგად ფუნქციონირებადი მთავრობის ინდექსით საქართველო მსოფლიოში მოწინავეთა შორისაა (38-ე ადგილი) და უსწრებს არა მარტო თავის სახმელეთო მეზობლებს, არამედ ევროკავშირისა და ნატოს 10 სახელმწიფოს.
„2025 წლის ივლისში საქართველოს ეკონომიკა ინარჩუნებდა მდგრადი და სტაბილური განვითარების ვექტორს, რითაც უზრუნველყოფილი იქნა მისი ზრდა 6.5 პროცენტით (იანვარ-ივლისში - 8.0 პროცენტით), რომელიც საგრძნობლად (- დაახლოებით 1.7-ჯერ!) აღემატება როგორც რეგიონის, ისე გლობალური მასშტაბით ზრდის შესაბამის ტემპებს. ზრდა უზრუნველყო ეროვნული მეურნეობის დარგებმა, სადაც იქმნება სამამულო პროდუქტის დაახლოებით 85 პროცენტი.
2025 წლის საქართველოს ეკონომიკა თავისი მასშტაბით პანდემიანდელ, 2019 წლის დონეს რეალურ განზომილებაში 40.7 პროცენტით აღემატება, რაც გლობალური ეკონომიკის ზრდის ანალოგიურ მაჩვენებელს (+16.3%) 2.5-ჯერ უსწრებს. ბოლო 6 წლის მანძილზე საქართველოს ეკონომიკის მატების საშუალო წლიური მატების ტემპი გლობალური ეკონომიკის ანალოგიურ მაჩვენებელს 2.3-ჯერ აღემატებოდა.
ინფლაციამ, 2025 წლის ივლისში, წინა წლის ივლისთან, 4.3 პროცენტი შეადგინა, ამასთან, წინა თვესთან შედარებით ივლისში ფასების საერთო დონე საქართველოში შემცირდა 0.2 პროცენტით, რის გამოც წინა თვესთან შედარებით ივლისი, ისევე როგორც ივნისი, დეფლაციური აღმოჩნდა. შედარებისათვის: 2025 წლის ივლისში, ივნისთან შედარებით, სამომხმარებლო ფასებმა აშშ-ში მოიმატა 0.2 პროცენტით, ხოლო ევროკავშირში - 0.3 პროცენტით. აღსანიშნავია, რომ ლარის გამყარების გამო (2025 წ. ივლისში 2024 წ. ივლისთან - 0.7%-ით), იმპორტული სამომხმარებლო საქონლის მიხედვით ივლისი, ისევე როგორც წინა სამი თვე, დეფლაციური იყო. - ფასების ზრდა ძირითადად განპირობებული იყო ადგილობრივი წარმოშობის ცალკეული სახეობების საქონლისა და მომსახურების გაძვირებით.
მსოფლიოში მოწინავეთა შორისაა (38-ე ადგილი) და უსწრებს არა მარტო თავის სახმელეთო მეზობლებს, არამედ ევროკავშირისა და ნატოს 10 სახელმწიფოს.
საქართველოს ეკონომიკა, მასში დაგროვილი პოზიტიური კუმულატიური მუხტისა და განვითარების პოტენციალის გათვალისწინებით, აბსოლუტურად რეალისტურს ხდის ასეთივე პოზიტიური ტრენდის შენარჩუნებას მომავალშიც, საშუალოვადიან პერიოდში. კერძოდ, ავტორიტეტული საერთაშორისო ორგანიზაციების ყველაზე კონსერვატორული პროგნოზითაც კი 2030 წლამდე საშუალო წლიური მატების ტემპი საქართველოს ეკონომიკას დაახლოებით 1.8-ჯერ უფრო მაღალი ექნება გლობალურ ეკონომიკასთან შედარებით (5.0% vs. 2.8%). აღნიშნული გარემოება ქმნის ობიექტურ საფუძველს არა მარტო საქართველოს მოსახლეობის კეთილდღეობის არსებითი ზრდის უზრუნველსაყოფად, არამედ ჩვენი ქვეყნის გლობალურ ეკონომიკაში უფრო წონად და ანგარიშგასაწევ სუბიექტად წარმოსაჩენად.“ - წერს არჩვაძე.
