უკრაინის პრეზიდენტმა, ვოლოდიმირ ზელენსკიმ ხელი მოაწერა კანონპროექტს „უკრაინული ერის ეროვნული მეხსიერების სახელმწიფო პოლიტიკის საფუძვლების შესახებ“. მასში ოფიციალურ დონეზე დამკვიდრდა ცნება „რაშიზმი“, – ამის შესახებ უკრაინის უმაღლეს რადაში განაცხადეს.
კანონის მიხედვით, „რაშიზმი“ განისაზღვრება როგორც „ტოტალიტარული იდეოლოგიისა და პრაქტიკის ახალი სახე, რომელიც წარმოადგენს სახელმწიფო-აგრესორის (რუსეთის) რეჟიმის საფუძველს და ეფუძნება რუსული შოვინიზმისა და იმპერიალიზმის ტრადიციებს, საბჭოთა კავშირის კომუნისტური რეჟიმის და ნაციონალ-სოციალიზმის (ნაციზმის) პრაქტიკას“.
კანონი ასევე ითვალისწინებს უკრაინული ენისა და კულტურული მემკვიდრეობის დაცვის უზრუნველყოფას, როგორც უკრაინის ეროვნული უსაფრთხოების შემადგენელი ნაწილს.
დოკუმენტში აღნიშნულია: „2014 წლის თებერვალში დაწყებულ შეიარაღებულ აგრესიაში სახელმწიფო-აგრესორი მანიპულირებს ისტორიული მოვლენების ინტერპრეტაციებით. რუსეთის ფედერაციის შეიარაღებული აგრესიის ერთ-ერთი შემადგენელი ნაწილი არის უკრაინელებისთვის ისტორიული მეხსიერების წართმევის მცდელობა.” გარდა ამისა, კანონი განსაზღვრავს ისეთ ცნებებს, როგორიცაა „უკრაინის დამოუკიდებლობისთვის ომი“, „ეროვნული მეხსიერება“, „ისტორიული ანტიუკრაინული პროპაგანდა“, „დანაშაული უკრაინელი ერის წინააღმდეგ“ და დეკლარირებულია სახელმწიფოს სრულფასოვანი მხარდაჭერა უკრაინის ისტორიის შესახებ სამეცნიერო კვლევების განხორციელებისა და ქვეყნის ისტორიის პოპულარიზაციის მიმართულებით.
