სილამაზის ინდუსტრიაში ყველა ოცნებობს იმაზე, რასაც Rhode-მა მიაღწია — მილიარდდოლარიანი შეფასება, მიმდევრები და ბრენდი, რომელიც ყველა პლატფორმაზე დომინირებს. რაღა თქმა უნდა, Rhode-ის უეცარი ზრდა იშვიათი შემთხვევაა და არც ყველა ბრენდს აქვს ფუფუნება, დაეყრდნოს მაღალი რანგის დამფუძნებელს თუ სოციალურ ქსელებში მასიურ ყოფნას. შესაძლოა, Rhode-ის წარმატება ცნობილი ინფლუენსერობით განპირობებულად ჩათვალოს ბევრმა, მაგრამ სიმართლე ის არის, რომ ჰეილი ბიბერმა უბრალოდ კიდევ ერთი პროდუქციის ხაზი კი არ გამოუშვა, არამედ ნაფიქრი ბრენდი შემოგვთავაზა, რომელსაც კეთილდღეობის, სილამაზისა და სიმარტივის ეკოსისტემაში აქვს ფესვები გადგმული.
ხოლო E.l.f.-ისთვის მთავარი კითხვა შემდეგია: რა მოხდება მომავალში? ქვემოთ სწორედ ამ კითხვაზე შევეცდებით პასუხის გაცემას და იმ იდეებს განვიხილავთ, რომლებიც ბრენდს წარმატების მიღწევაში დაეხმარება, ხოლო მეწარმეებისთვის გაკვეთილად გამოდგება:
ბრენდის მნიშვნელობის გააზრება
ე. წ. ჰაიპსა და მნიშვნელობას შორის ბალანსი უმნიშვნელოვანესია ავთენტური ჩართულობის შესანარჩუნებლად. ჰაიპი თქვენს ბრენდს შესამჩნევს ხდის, აქ საქმე საუბრების თემად ყოფნას და აუდიტორიასთან დაკავშირებას ეხება. მეორე მხრივ კი, მნიშვნელობაა სწორედ ის, რაც სხვებს თქვენს ბრენდს აყვარებს. ეს არის იმ ურთიერთობის სიღრმე, რომელიც თქვენს მომხმარებლებს თქვენსავე ბრენდთან აქვთ, ბრენდის იდენტობას, თანმიმდევრულობასა და კულტურულ ინტეგრაციას ეფუძნება.
პრობლემა კი მაშინ წარმოიქმნება, როცა ჰაიპი მნიშვნელობას სჯობნის. როცა ბრენდები სწრაფ სვლაზე არიან ორიენტირებულნი და ნაკლებად უერთგულებენ თავიანთ მესიჯს. რაღაც მხრივ გასაგებიც არის — როცა კომპანიას დიდი ფულის სანაცვლოდ იძენენ, შედეგების დანახვაც მალევე სურთ. თუმცა ინფლუენსერების პროცესში ჩართვითა და უამრავი კონტენტით ლოიალური მომხმარებლები შეიძლება დააბნიონ. ამის თავიდან ასაცილებლად კი მნიშვნელოვანია, გუნდის ახალმა წევრებმა და პარტნიორებმა, რეალურად გაიაზრონ, რისთვის არის ეს ბრენდი.
Offline აქტივობებიც მნიშვნელოვანია
მას შემდეგ, რაც ნარატივი მკაფიო და შედეგები განსაზღვრული გახდება, უნდა გაიაზროთ, სად და როგორ განახორციელებთ მათ. ბრენდის მომწიფებასთან ერთად, მნიშვნელოვანია, თქვენს საზოგადოებას აჩვენოთ, სად ცხოვრობენ ისინი და არა, სად სქროლავენ.
პირდაპირ მომხმარებელზე ორიენტირებული ბრენდებისთვის ვებსაიტისა და ციფრული პლატფორმების ოპტიმიზაციის საკითხი უმთავრესი რჩება. თუმცა როგორც კი მათთვის მნიშვნელოვან ოდენობას მიაღწევენ, მნიშვნელოვანია, Offline სივრცეშიც სწრაფად გადავიდნენ. ეს ფსიქოლოგიური ამბავია. თუ ტიკტოკი გვეუბნება, რომ ტრენდული, ახალგაზრდული სივრცეა, ფიზიკური მაღაზიები, ბრენდებთან პარტნიორობა, ღონისძიებები, ინსტალაციები, ვიზაჟისტებთან შეხვედრები და უკვე მოძველებულად ცნობილი მედია ამბობს, რომ როცა და სადაც არ უნდა დაგჭირდეთ, ყოველთვის ხელმისაწვდომი იქნება.
ხშირად ბრენდების ახალი მფლობელები ამ უკანასკნელისთვის თავის არიდებას ცდილობენ, რადგან დაბალი შემოსავლების მქონედ აღიქვამენ, თუმცა რეალურად ბრენდის ყველა არხსა და შეხების წერტილში წარმოდგენით ბაზარს ანიშნებთ, რომ ეს ბრენდი მყარი და სანდოა.
ავთენტურობა იმარჯვებს
მოდით, ახლა ის ვთქვათ, რა განასხვავებს სილამაზის სექტორში მყოფ ბრენდებს სხვებისგან. ეს კიდევ ერთი რუტინა ნამდვილად არ გახლავთ, საქმე ავთენტურობაშია. მაგალითისთვის, Milk-ის სლოგანი შეგვიძლია, მოვიყვანოთ: Milk girls do their makeup in the backs of cabs, რასაც თამამი კამპანია და შეფუთვაც მოჰყვა. შედეგად კი ყველაფერი ასახეს, რასაც სინამდვილეში ბრენდი აკეთებს და თითოეული ქმედება ავთენტური იყო. ამგვარად, Milk-მა შემოქმედებითი და ჭკვიანური რისკებით ყველაზე გადაჭედილ ბაზარზეც კი მოახერხა ყურადღების მიპყრობა. ეს კი მაშინ ხდება, როცა ბრენდი თავიდანვე ძლიერ იდენტობას ქმნის.
ჭკვიანურად გაფართოება
სტრატეგიული მენეჯმენტის მამად წოდებული იგორ ანსოფის მატრიცის ხელსაწყო კომპანიის გაფართოების 4 გზას გვთავაზობს:
- ბაზარზე შესვლა — უფრო მეტი პროდუქტის გაყიდვა არსებულ აუდიტორიაზე.
- ბაზრის განვითარება — ახალ ბაზრებზე შესვლა.
- პროდუქტის განვითარება — ახალი პროდუქტების შექმნა.
- დივერსიფიკაცია — ბიზნესის ახალ მიმართულებებში შესვლა.
და თუ Rhode-ის მასშტაბს გადავხედავთ, ოთხივე წარმატებით შეუძლია, გააკეთოს. მთავარია, პროცესს სტრატეგიულად და მეთოდურად მიუდგეს. ამ მატრიცის მიხედვით, E.l.f.-ს აქვს შესაძლებლობა, ახალ ბაზრებზე შესვლის საკითხი განიხილოს და არც ახალი ხაზები დააყოვნოს, თუნდაც მამაკაცებისთვის…
ასეა თუ ისე, Rhode-ის წარმატება მიგვანიშნებს, რომ როცა ბრენდი პროდუქტების გარდა, სხვა რაღაცებისთვისაც იქმნება, შედეგი არ აყოვნებს. სწორედ ამიტომაა მნიშვნელოვანი ბრენდის იდენტობის ადრეულ ეტაპზე განსაზღვრა და მისი ერთგულება ყველაფრის ფასად.