– გამარჯობა, რით შემიძლია დახმარება? – ეს AI ასისტენტების უმრავლესობისთვის დამახასიათებელი ფრაზაა, რომლითაც ჩვენი მათთან დიალოგი იწყება. ხელოვნური ინტელექტის მქონე ჩატბოტებს უკვე ყოველდღიურად ვიყენებთ უამრავი კონტენტის დასამუშავებლად, მაგრამ არის თუ არა იგი სარეკლამო სფეროს წარმომადგენლებისთვის მისაღები ინსტრუმენტი, ამაზე ჯერ კიდევ არსებობს კითხვები, მიმდინარეობს განხილვა და განსჯა გლობალურად.
თუკი ადრე, ათწლეულების განმავლობაში, კრეატივის შექმნაში მონაწილეობდნენ ადამიანები, დღეს შემოქმედებითი პროცესები სულ უფრო მეტად მონაცემებზე დაფუძნებული ხდება; მონაცემებზე, რომელთა უკანაც მანქანა დგას.
კანადელმა ფილოსოფოსმა, მარშალ მაკლუენმა, რომელსაც ხშირად „მედიის მამას“ უწოდებენ, ერთხელ ივარაუდა, რომ ჩვენს ადამიანურ გამოცდილებას ის უფრო განსაზღვრავს, როგორ ვამყარებთ კომუნიკაციას, ვიდრე ის, თუ როგორია თავად კონტენტი. ბეჭდური მედიიდან ტელევიზიაზე, მერე ციფრულზე გადასვლამარა მხოლოდ შეცვალა ის, რასაც მოვიხმარდით, არამედ შეცვალა ჩვენი აზროვნების, მოქმედებისა და სამყაროში გამოჩენის გზები. ხელოვნური ინტელექტი ახლა ამ მიმართულებით ლიდერია.
იგივე მაკლუენი იმასაც ამბობდა, რომ: „ჩვენ ვქმნით ინსტრუმენტებს და შემდეგ ჩვენი ინსტრუმენტები გვქმნიან ჩვენ“, რაც, დღევანდელი გადმოსახედიდან, AI-სთან მიმართებით გამართლდა. ხელოვნური ინტელექტი უბრალოდ მორიგი ინსტრუმენტი არ არის, ის თავად რეკლამის მთელი არქიტექტურის რესტრუქტურიზაციას ახდენს.
სხვა სიტყვებით რომ ვთქვათ, ეს არ არის მხოლოდ პროცესების ავტომატიზაცია, არამედ უკვე მათი განსაზღვრა და მიმართულების მიცემაა; არც უბრალოდ რეკლამების გენერირებაა, არამედ უკვე ხელოვნური ინტელექტი წყვეტს, საერთოდ ღირს თუ არა რეკლამის გაკეთება. ეს კი სცდება ასისტენტის როლს და ახალ საფეხურზე გადადის.
ეს ცვლილება რადიკალურად ცვლის წლების განმავლობაში გამყარებულ მიდგომას, რომლის მიხედვითაც, აუცილებელი იყო ადამიანური ინტუიცია, შინაგანი ინსტინქტი და ისტორიების მოყოლა, რაც ბრენდის იდენტობას განაპირობებდა. ახლა ალგორითმები განსაზღვრავენ, რა არის რელევანტური, უპირატესობას ანიჭებენ ეფექტურობასა და მონაცემებს, რამაც ემოციურად ცოტა შეანელა ინდუსტრია.
არსებული მოსაზრებების თანახმად, ჩნდება კითხვა – როგორი იქნება კრეატიული ინდუსტრიის თანამშრომლების მომავალი? თუკი ყველაფერი ხელოვნურმა ინტელექტმა უნდა გვიკარნახოს, ჩვენ რა უნდა ვაკეთოთ, მისი მოცემული დავალებები შევასრულოთ? ჯერჯერობით ამ კითხვის ცალსახა პასუხი არ არსებობს.
თუ ტექნოლოგიურ ევოლუციას გადავხედავთ, ვნახავთ, რომ ყველაფერი რაღაცით ჩანაცვლა ოდესღაც. გახსოვთ, ბეჭდურ ტექნოლოგიებს რომ დავემშვიდობეთ, რადგან ციფრული მედია გაჩნდა, მაგრამ ოპტიმისტურად განწყობილი მარკეტერ-შემოქმედები გვამშვიდებენ, რომ ადამიანის მთავარ უნარს, ქმნადობას, ვერაფერი ჩაანაცვლებს. უბრალოდ, ხელოვნური ინტელექტი გვაძლევს დროს, ვაკეთოთ ის, რაც კარგად გამოგვდის.
არ დაგავიწყდეთ ისიც, რომ სარეკლამო ინდუსტრია მხოლოდ რაღაცის გენერირება არ არის. ის ფსიქოლოგიის, კულტურისა და თხრობის ნაზავია. შეუძლია თუ არა ხელოვნურ ინტელექტს ამ სამი ფუნქციის შეთავსება? შეუძლია თუ არა მას ისეთი ბრენდის შექმნა, რომელიც ხალხს მოეწონება? – ეს კითხვებიც ჯერჯერობით ღიაა.
მოდი, გავიხსენოთ 3 დიდი და ძველი კამპანია:
ერთი – ეს არის Volkswagen-ის ‘Think Small’, 1959 წლის კამპანია, შექმნილი, რა თქმა უნდა, ადამიანების მიერ, რომელმაც მაშინ სარეკლამო სფეროში დიდი გარღვევა მოახდინა;
მეორე – Nike-ის ‘Just Do It’*, 1980. ეს კამპანია მონაცემებზე დაფუძნებული არ იყო და დღესაც კულტურულ მოძრაობად არის აღიარებული;
და მესამე: Always #LikeAGirl, 2014 – კამპანია, რომელმაც ახალი გენდერული ნორმების ჩამოყალიბებას შეუწყო ხელი.
რა თქმა უნდა, ხელოვნურ ინტელექტს შეუძლია ამ კამპანიების ოპტიმიზაცია შემდგომში, თუმცა მას მათი შექმნა არასდროს შეეძლო. მცდარია იმის ფიქრი, რომ ხელოვნურ ინტელექტს შეუძლია, ჩაანაცვლოს ადამიანის გამომგონებლობა, სტრატეგიული სიღრმე და კულტურული ინტუიცია, ანუ ყველაფერი, რაც განსაზღვრავს შესანიშნავ ბრენდინგს ბიზნესისთვის.
დასკვნის სახით, სპეციალისტები ჯერჯერობით იმას ამბობენ, რომ რეკლამის რეალური ძალის ავტომატიზება შეუძლებელია. ნამდვილი ძალა ადამიანის შემოქმედების ნაპერწკალია, სული, რომელიც ხელოვნურ ინტელექტს არ აქვს და, ალბათ, ვერც ექნება.
იმასაც გვეუბნებიან, რომ ხელოვნური ინტელექტი მტერი არ არის, მაგრამ ის გვაიძულებს, რომ განვვითარდეთ. საბოლოო ჯამში კი, ტექნოლოგია ჩვენ უნდა გვემსახუროს და არა – პირიქით.
წყარო: marketer.ge
